Saturday, August 4, 2012

ထားဝယ် အထူးစီးပွားရေးဇုန်



ဗမာစစ်အစိုးရနဲ့ အီတာလျံ-ထိုင်း (Italian-Thai Development Public Company Limited) ကုမ္မဏီတို့ သဘောတူခဲ့ကြတဲ့ ထားဝယ် အထူးစီမံကိန်းဇုန်နဲ့ ရေနက်ဆိပ်ကမ်း တည်ဆောက်ရေး စီမံကိန်းကို ဆက်လက်အကောင်အထည်ဖော်ဖို့ မြန်မာနဲ့ ထိုင်းအစိုးရတို့ ဇူလိုင်လနှောင်းပိုင်းက နားလည်မှုစာချွန်လွှာတွေ လက်မှတ်ထိုးကြပါတယ်။ ဒေသခံတွေရဲ့  ကန့်ကွက်မှု၊ ကျောက်မီးသွေးသုံး လျှပ်စစ်ဓါတ်အား စီမံကိန်းကို ဇန္နဝါရီလအစောပိုင်းမှာ ဦးသိန်းစိန်အစိုးရက ရပ်ဆိုင်းမှု၊ ငွေရင်းအလုံအလောက်ရဖို့ ခက်ခဲမှု စတာတွေကြောင့် နှောင့်နှေးကြန့်ကြာမရေမရာ ဖြစ်နေတဲ့ စီမံကိန်းကို ဖြစ်မြောက်အောင်လုပ်ဖို့ ထိုင်းနဲ့ဗမာအစိုးရတို့က ဆုံးဖြတ်လိုက်တာ ဖြစ်ပါတယ်။

ထားဝယ် အထူးစီးပွားရေးဇုန်နဲ့ ရေနက်ဆိပ်ကမ်းတည်ဆောက်ရေး ၂၀၁၄ မှာ အာဆီယံဥက္ကဌလုပ်မယ့် ဗမာအစိုးရရဲ့  လိုအပ်ချက်တွေကို ကူညီရေး၊ လူသားစွမ်းရည်တိုးတက်ဖို့ ပူးတွဲဆောင်ရွက်ရေး၊ အခြေခံအဆောက်အအုံ တည်ဆောက်ရာမှာ ကူညီရေး၊ လောင်စာစွမ်းအင်ကိစ္စမှာ ပူးတွဲလုပ်ဆောင်ရေး စတာတွေကို ထိထိရောက်ရောက် အကောင်အထည်ဖော်ဖို့ မြန်မာနဲ့ ထိုင်းအစိုးရတို့ ဆုံးဖြတ်ကြပါတယ်။ အကျယ်အဝန်း စတုရန်းမိုင် တစ်ရာမှာ အထူးစီးပွားရေးဇုန် တည်ဆောက်မယ့် (၁၀) နှစ် စီမံကိန်းပါ။ နောက်ပြီးတော့ ကားလမ်း-ရထားလမ်း ဖောက်ပြီး ထိုင်းနိုင်ငံနဲ့ ဆက်ထားမှာ ဖြစ်ပါတယ်။

ရေနက်ဆိပ်ကမ်းအပြင် သင်္ဘောကျင်း၊ ရေနံဓာတုစက်ရုံ၊ ရေနံချက်စက်ရုံ၊ သံမဏီစက်ရုံ၊ လျှပ်စစ်ဓါတ်အားစက်ရုံ၊ ဓါတ်မြေသြဇာစက်ရုံ စတာတွေကို အကျယ်အဝန်း စတုရန်းမိုင် (၁၀၀) ရှိမယ့် အထူးစက်မှုဇုန်မှာ တည်ဆောက်မယ့် (၁၀) နှစ် စီမံကိန်း ဖြစ်ပါတယ်။ အခြေခံအဆောက်အအုံ တည်ဆောက်ဖို့ ဒေါ်လာသန်းရှစ်ထောင် ကုန်ကျမယ်လို့ ခန့်မှန်းပြီး တဆင့်ပြီးတဆင့် တိုးချဲ့ သွားရင် ဒေါ်လာသန်း ငါးသောင်းကျော်အထိ ကုန်ကျနိုင်တယ်လို့ ခန့်မှန်းကြပါတယ်။ အလွန်ကြီးမားတဲ့ စီမံကိန်းဖြစ်တာမို့ ငွေရင်းစိုက်ထုတ်နိုင်ရေးဟာ အဓိက ပြဿနာ ဖြစ်နေပါတယ်။ ဒါပေမဲ့ ဦးသိန်းစိန်ရဲ့  ခရီးစဉ်အတွင်းမှာ ထိုင်းအစိုးရပိုင် PTT () စွမ်းအင်ကုမ္မဏီက ဒေါ်လာသန်း သုံးထောင် စိုက်ထုတ်ဖို့ ကတိပြုလိုက်ပါတယ်။ ထိုင်းအစိုးရကစပြီး ရင်းနှီးမြုပ်နှံတာကြောင့် အခြားနိုင်ငံတွေ ပါဝင်ဖို့ အလားအလာရှိသွားပါတယ်။

ထိုင်းမှာအခြေစိုက်ပြီး (၁၅) နိုင်ငံမှာ ရင်းနှီးမြုပ်နှံထားတဲ့ Charoen Pokphand ခေါ် CP အုပ်စုကလည်း လာမယ့် (၃) နှစ်အတွင်း ဒေါ်လာသန်း (၅၅၀) ထားဝယ် အထူးစီမံကိန်းဇုန်မှာ ရင်းနှီးပြီး စိုက်ပျိုးရေးနဲ့ မွေးမြူးရေးလုပ်ငန်းတွေ လုပ်ကိုင်သွားမယ်လို့ ဆိုပါတယ်။ CP အုပ်စုဟာ ဒေါ်လာသန်း (၁၅၀) မြန်မာပြည်မှာ ရင်းနှီးထားပြီး ဖြစ်ပါတယ်။ လွန်ခဲ့တဲ့ အနှစ် (၉၀) က တရုတ် ညီအကို တည်ထောင်ခဲ့တဲ့ CP အုပ်စုဟာ တရုတ်ပြည်မှာ ဈေးကွက်ဖွင့်တုန်းကလည်း ရှေ့ တန်းကပါဝင်ပြီး နိုင်ငံတကာကုမ္မဏီတွေနဲ့ လက်တွဲလုပ်ကိုင်ပါတယ်။ အကြီးဆုံး ဘိလပ်မြေကုမ္မဏီဖြစ်တဲ့ Siam Cement ခေါ် SCG ကလည်း ဒေါ်လာသန်း (၃၃၀) စိုက်ထုတ်ပြီး ထားဝယ်မှာ ဘိလပ်မြေစက်ရုံ တည်ဆောက်တော့မယ်လို့ ဆိုပါတယ်။ ထားဝယ်တင်မကဘဲ အခြားနေရာမှာ စီးပွားရေးလုပ်လိုတဲ့ ထိုင်းကုမ္မဏီတွေလည်း ရှိပါတယ်။ နိုင်ငံခြားရင်းနှီးမြုပ်နှံမှု ဥပဒေထွက်လာဖို့ စောင့်နေကြတာလို့ ဆိုပါတယ်။

ထားဝယ် အထူးစီးပွားရေးဇုန် တည်ဆောက်တဲ့အတွက် ထိုင်းကသာ အများဆုံး အကျိုးအမြတ်ရလိမ့်မယ်လို့ Australia နိုင်ငံက ပါမောက္ခ Sean Turnell က ဗွီအိုအေ ကို ပြောပြပါတယ်။ ထားဝယ် စီမံကိန်းရဲ့  အဓိကရည်ရွယ်ချက်က ထိုင်းနိုင်ငံရဲ့  အနောက်ဖက် ဆိပ်ကမ်းအဖြစ် ထိုင်းကုန်ပစ္စည်းတွေ အလွယ်တကူ မြန်မြန်ဆန်ဆန် ဝင်ထွက်နိုင်ဖို့ ဖြစ်ပါတယ်။ မလက္ကား ရေလက်ကြားကို ဖြတ်ပြီး ထားဝယ် နဲ့ ထိုင်းကို ပိုက်လိုင်းနဲ့ ဆက်သွယ်ပြီး အရှေ့ အလယ်ပိုင်းက သယ်ယူလာတဲ့ ရေနံစိမ်းကိုလည်း တင်သွင်းနိုင်တယ်လို့ တွက်ထားပါတယ်။ ဒါကြောင့် ထိုင်းနိုင်ငံရဲ့  အကျိုးစီးပွားကို မြှင့်တင်ရာမှာ ထားဝယ် အထူးစီးပွားရေးဇုန်ဟာ အရေးကြီးတဲ့ အခန်းကဏ္ဍက ပါဝင်လိမ့်မယ်လို့ ယုံကြည်ထားကြပါတယ်။

Wednesday, August 1, 2012

မောင်းမကန် ကမ်းခြေ မြေယာကိစ္စ ဒေသခံ များ ထားဝယ် အများပိုင် ကုမ္ပဏီထံ တောင်းဆိုချက်ပို့

http://www.ddamyanmar.com/?p=554

တနင်္သာရီ တိုင်းဒေသကြီး၊ ထားဝယ်မြို့၊ မောင်းမကန် ကမ်းခြေ၏ မြောက်ဘက်တွင် ဟိုတယ် တည်ဆောက်ရန်  ကမ်းခြေ တစ်လျှောက် မြေဧက ၄၀၀ ခန့်အား လုပ်ပိုင်ခွင့် ရသည့် ထားဝယ်ဒေသ ဖွံ့ဖြိုးတိုးတက်ရေး အများပိုင် ကုမ္ပဏီ ( DDPC ) အား မောင်းမကန် ဒေသခံ များက အချက် လေးချက် ပါဝင်သည့် အိတ်ဖွင့် ပေးစာကို ဇူလိုင်လ ၂၃ ရက်နေ့ရက်စွဲဖြင့် ပေးပို့ခဲ့သည်။

DDPC မှ ၎င်းတို့ လုပ်ပိုင်ခွင့်ရသည့် မြေဧရိယာရှိ သီဟိုဠ်ပင် များအား ဘူဒိုဇာ များဖြင့် ရှင်းလင်း သဖြင့် ဒေသခံများနှင့် ပဋိပက္ခ ဖြစ်ပွားပြီး နှစ်ပတ်ခန့်အကြာ ကုမ္ပဏီနှင့် မောင်းမကန် ဒေသခံများ ၃ ကြိမ်မြောက် တွေ့ဆုံပြီး ချိန်တွင် ယင်းသို့အိတ်ဖွင့်ပေးစာ ပေးပို့ခြင်းဖြစ်သည်။
ကြိုးပြင် ကာကွယ်တော အတွင်း ကျရောက် နေသည့် ဒေသ တစ်ခုလုံးအား မြေယာ ပိုင်ဆိုင်မှု အခိုင်အမာ ရရှိရေးအတွက် နိုင်ငံတော် အစိုးရနှင့် ပြည်သူ့လွှတ်တော်အား တိုက်တွန်း ပေးရန်၊ စီမံကိန်း အတွက် အမှန်တကယ် လိုအပ်သည့် မြေ ဧရိယာကိုသာ ယူရန် လုပ်ပိုင်ခွင့် ရသည့် မြေအား ဒေသခံ များ၏ သဘောထား မပါဘဲ လွဲပြောင်း၊ ရောင်းချ ခြင်း မပြုရန် နှင့် ဒေသ ဖွံ့ဖြိုးရေးအတွက် မည်သည့် လုပ်ငန်းများ ဆောင်ရွက် မည်ကို တိကျခိုင်မာ ပွင့်လင်းစွာ ထုတ်ဖော်ပြောရန် စသည့်အချက် ၄ ချက်ဖြင့် ပေးပို့ခဲ့သည်။

ကုမ္ပဏီအနေဖြင့် မည်သည့် လုပ်ငန်းများကို မည်သို့ ဆောင်ရွက်မည် မြေဧက မည်မျှခန့်လိုမည်ကို တိတိပပ မပြောနိုင်ဟု မောင်းမကန် ကျေးရွာ ဖွံ့ဖြိုးရေး ကော်မတီဝင် ဦးဇော်ဝင်းက ပြောသည်။
မောင်းမကန် ကျေးရွာ၏ မြောက်ဘက် မောင်းမကန် ကမ်းခြေနှင့် ပန်းတင်အင်း ချောင်းကြား မြေနေရာတွင် ဒေသခံများ၏ သဘောထားကို မေးမြန်း စုံစမ်းခြင်းမရှိဘဲ စက်ယန္တရားများ အသုံးပြု ရှင်းလင်းသဖြင့် ဒေသခံများက မကျေမနပ်ဖြစ်နေကြသည်။
“လုံးဝ မကျေနပ်ဘူး။ ဘယ်သူ့ကိုမှ အသိမပေးဘဲ သူတို့ဟာ သူတို့ လုပ်နေကြတယ် ” မောင်းမကန် ဒေသခံ ဦးထွန်းခင်က ဖွင့်ဟသည်။


ယခုလက်ရှိ အချိန်တွင် မောင်းမကန် ကျေးရွာအပါအ၀င် ကျေးရွာ ဆယ်ရွာခန့်သည် ၂၀၀၁ ခုနှစ်မှစပြီး  ကြိုးဝိုင်းပြင်ပ ကာကွယ်တောအဖြစ် သတ်မှတ်ခံထားရပြီး ၂၀၀၇ ခုနှစ်မှ စတင်ကာ တရားဝင် မြေခွန်များ ရပ်စဲသွားကြောင်း ဒေသခံများ၏ အကြုံပြုစာတွင် ဖော်ပြသည်။
ကြိုးပြင်ပ ကာကွယ်တော ဧရိယာအတွင်းရောက်နေသည့် ရွာများအား ကြိုးဝိုင်းပြင်ပ ကာကွယ်တောအဖြစ်မှ ပယ်ဖျက် ပေးရန်အတွက် တိုင်းဒေသကြီး အစိုးရထံသို့လည်း တောင်းဆိုရန် အစီအစဉ်ရှိသည်ဟု ဦးဇော်ဝင်းက ပြောသည်။
“ရွာတွေကို ကြိုးပြင် ကာကွယ်တော အဖြစ်က ပယ်ဖျက်စေချင်တယ်” ဟု ၎င်း၏ ဆန္ဒကို ထုတ်ဖော်ပြောသည်။


မောင်းမကန် ဒေသခံများမှ ပေးပို့သည့် စာကိစ္စနှင့်ပတ်သက်ပြီး မည်သို့ဆောင်ရွက်မည်ကို ဇူလိုင်လ ၂၆ ရက်နေ့ ကုမ္ပဏီ ဒါရိုက်တာအဖွဲ့ အစည်းအဝေးပြီးမှ သိနိုင်မည်ဖြစ်ကြောင်း DDPC ရုံးထံမှ သိရသည်။
“သြဂုတ်လဆန်းပိုင်းမှာ လာပြီးတော့ သေသေချာချာ ရှင်းပြဖို့ရှိပါတယ်” ဟု DDPC ကုမ္ပဏီ၏ ဥက္ကဌ  ဦးခင်စိုးက တယ်လီဖုန်းမှတဆင့် ပြောကြားသည်။
စီမံကိန်းနှင့် ပတ်သက်သည့် လုပ်ငန်းစဉ်များကို  ထင်သာမြင်သာ ဖော်ပြ တိတိကျကျ ပြောပြမှ သာလျှင် ဒေသခံများအနေဖြင့် တိကျသည့် ဆုံးဖြတ်ချက်ကို ချနိုင်မည်ဟု မောင်းမကန် ဒေသခံ ကိုယူသိန်းက ဆိုသည်။


“ အခုက သုံးမယ့် ဧရိယာ ဘယ်လောက်ဆိုတာကိုလည်း မပြောနိုင်ဘူး” ဟု ကိုယူသိန်းက ထောက်ပြသည်။
အဆိုပါ ကိစ္စနှင့် ပတ်သက်ပြီး ထားဝယ် ၈၈ မျိုးဆက် ကျောင်းသားများ အဖွဲ့မှလည်း သုံးသပ်အကြုံပြုချက် အိတ်ဖွင့်ပေးစာ တစ်စောင်ကို ဇူလိုင်လ ၂၃ ရက်နေ့ ၊ မောင်းမကန် ဒေသခံများနှင့် တစ်ရက်တည်း ထားဝယ်ဒေသဖွံ့ဖြိုးတိုးတက်ရေး အများပိုင် ကုမ္ပဏီနှင့် တိုင်းဒေသကြီး အစိုးရအဖွဲ့ထံ သို့ ပေးပို့ခဲ့သည်။



ယင်းကဲ့သို့ မြေယာ ပြဿနာများဖြစ်ရခြင်းသည် မြေယာ ဥပဒေ၏ လျော့ရဲမှု ၊ ဒေသခံများ၏ ဗဟုသုတ နည်းပါးမှု နှင့် ကျေးရွာ အုပ်ချူပ်ရေးမှုးအပါအ၀င် ဌာနဆိုင်ရာများ၏ ပေါ့လျော့မှုကြောင့်ဟု ထားဝယ် ၈၈ မျိုးဆက် ကျောင်းသား အဖွဲ့မှ ဦးကျော်ကျော်သက်က သုံးသပ်သည်။
DDPC မှ လုပ်ပိုင်ခွင့်ရသည့် ဧရိယာမှာ ကမ်းခြေမြောက်ပိုင်းဖြစ်ပြီး ကမ်းခြေတောင်ပိုင်း ဧရိယာသည် ၃၇၀ ဧက ကျော်ရှိပြီး ကာကွယ်ရေး ၀န်ကြီးဌာန (ကြည်း) ပိုင် မြေဖြစ် သတ်မှတ်ထားသည်ဟု ဒေသခံများက ပြောသည်။

DDPC မှ လုပ်ပိုင်ခွင့်ရသည့် ဧရိယာတွင်းရှိ သီဟိုဠ်ပင်များကို မောင်းမကန်ကျေးရွာအုပ်စုဝင် အိမ်ခြေ ၁၂၀ ခန့်ရှိသည့် ကဗွီးနှစ်ပင်ကျေးရွာနှင့်  အိမ်ခြေ ၃၀၀ ခန့်ရှိသည့် အံတောပြင်ကျေးရွာ နှစ်ရွာမှ အခြေခံ လူထု အများစုမှီခိုသည်ဟု ထားဝယ် ၈၈ မျိုးဆက်ကျောင်းသားများအဖွဲ့၏ အိတ်ဖွင့်ပေးစာတွင် ဖော်ပြသည်။
“ဒေသခံတွေရဲ့ အကျိုးကိုလိုလားပြီး သူတို့ ဘ၀ စာနာနိုင်တဲ့ ဒါရိုက်တာ အဖွဲ့ဖွဲပြီး ညှိနှိုင်း ဆောင်ရွက်သင့်တယ်” ဟု ဦးကျော်ကျော်သက်က အကြံပြုသည်။
ထားဝယ်ဒေသဖွံဖြိုးတိုးတက်ရေး အများပိုင် ကုမ္ပဏီ (DDPC) အား ၂၀၁၂ ခုနှစ် မတ်လ ၁၀ ရက်နေ့တွင် စတင် အကောင်အထည် ဖော်ပြီး အမှုဆောင် ဒါရိုက်တာ ၄၆ ဦး ၊ ဒေသခံ အစုရှယ်ယာရှင် ၆၀၀ ကျော်နှင့် စတင် တည်ထောင်ခဲ့ပြီး ထားဝယ်ဒေသတွင် စီးပွားရေးနှင့် လူ့စွမ်းအားအရင်းအမြစ် ဖွံ့ဖြိုးရေးလုပ်ငန်းများ လုပ်ကိုင်ရန် စီစဉ်နေသည်။
From Dawei Watch